Bakıda narkoman valideynlər uşağa işgəncə veriblər. Bu haqda 9 avqust tarixində Lent.az məlumat verib.
Nərimanov rayonunda yaşayan ailədə körpəyə işgəncə verilib və nəticədə uşaq ailədən alınıb. İlkin baxış zamanı uşağın əlində yaralar aşkarlanıb. Ehtimal olunur ki, bu, baxımsızlıqdan və ya uşağın valideynləri tərəfindən işgəncəyə məruz qalmasından əmələ gələ bilər.
“Azərbaycan Uşaqlar Birliyi"nin sədri Kəmalə Ağazadə körpənin hər iki valideyninin narkotik aludəçisi olduğunu deyib:
"Uşağı gecə saatlarında Nərimanov rayon polis şöbəsinin əməkdaşları sığınacağa gətiriblər. Körpənin təxminən 2 yaşı olar. Onun hər iki valideyni narkotik istifadəçisidir. Bununla bağlı Nərimanov rayon İcra Hakimiyyətinə müraciət edəcəyik ki, məsələni nəzarətə götürsünlər. Sosial Xidmətlər Agentliyi tərəfindən ailə qiymətləndirilsin".
