Bakının Qış parkında iki sevgilini soyan iki nəfərin cinayət işi üzrə məhkəmə keçirilib. Bu haqda bu gün, 2 noyabr tarixində Qafqazinfo məlumat verib.
Verilən məlumata görə, Bakı Ağır Cinayətlər Məhkəməsində Səxavət Quliyev və Nicat Məmmədova (adlar şərtidir) hökm oxunub. Hər iki şəxs 8 il müddətinə azadlıqdan məhrum edilib.
Hadisə cari il aprelin 17-də baş verib. Qış parkında Quliyev və Məmmədov sevgilisi ilə skamyada əyləşmiş Həbib adlı gənci kənara çəkərək, ona bu cür davranışın ətrafdakı insanların narahatlığına səbəb olduğunu bildiriblər.
“Camaatın anası-bacısı olan yerdə, eləcə də Ramazan ayında belə hərəkət etmək olmaz”, - deyə dostlar Həbibə irad tutublar. Bu zaman isə Həbib onlardan üzr istəyib. Nicat isə cavab olaraq: “Pul verdiyin halda üzrxahlığını qəbul edə bilərik”, - deyib. Həbib üzr istəməyə çalışsa da, pulu verənə qədər üzrxahlığını qəbul etməyiblər.
Yaxınlaşanlardan birində bıçaq görən Həbib onlara 240 manat verib. Həbibin pulqabısında bank kartı olduğunu görən gənclər ondan bütün pulları çıxarıb onlara verməsini tələb ediblər. Pulun bir hissəsini saxlamağa çalışan zərərçəkmiş kartında cəmi 50 manat olduğunu bildirib. Lakin xuliqanlar onunla birlikdə bankomata getmək qərarına gəliblər. Oğlanın kartında 130 manat pul qaldığını görüb, yalan danışdığına görə onu daha 50 manat “cərimə” ediblər. Zərərçəkmiş xuliqanlardan yaxa qurtarmaq üçün dostundan borc pul götürməyə məcbur olub.
Zərərçəkmiş hadisə barədə polisə məlumat verib. Şübhəlilər Yasamal Rayon Polis İdarəsinin əməkdaşları tərəfindən saxlanılıblar.
