Bakıda nazirlik avtomobilinin iştirakı ilə yol-nəqliyyat hadisəsi baş verib. Bu haqda BakuPlus.az Oxu.az-a istinadən bu gün, 30 iyul tarixində xəbər verir.
Ötən gün Nəsimi rayonu ərazisində, “Yeganə” şadlıq sarayının yaxınlığında yüksək sürətlə hərəkət edən 90-FH-005 nömrə nişanlı “BMW” markalı avtomobil “Hyundai Santa Fe” markalı avtomobilə çırpılıb.
Hadisə şahidlərinin sözlərinə görə, qəza baş verdikdən dərhal sonra “BMW”-dəki sərnişin başqa avtomobilə əyləşərək ərazini tərk edib.
Qəzanı törədən sürücü avtomobilin nazir müavininə məxsus olduğunu, yüksək vəzifəli məmura xidmət etdiyini, buna görə də bütün hallarda günahkar sayılmayacağını deyib. Daha sonra o, yol polisi ilə danışıb. “Santa Fe”-nin sahibi əraziyə yol polislərini dəvət etsə də, gələn olmayıb.
Bir qədər sonra hadisə yerinə yol polisi əvəzinə Post Patrul Xidmətinin əməkdaşları gəlib.
Onlar avtomobilləri kənara çəkərək, yolu təmizləməyə göstəriş veriblər.
Zərərçəkən sürücü etiraz etdikdə, ona bildirilib ki, ərazidə kamera var və sabah (bu gün - red.) təqsirin kimdə olduğu kameralara baxılaraq müəyyənləşdiriləcək.
