Bakıda polis əməkdaşlarının “saxla” əmrinə tabe olmayıb qaçan şəxslər saxlanılıblar.
Bakuplus.az Daxili İşlər Nazirliyinə istinadən xəbər verir ki, hadisə sentyabrın 24-də saat 03:44 radələrində Yasamal rayonu, Z.Əhmədbəyov küçəsində baş verib.
Narkotik vasitələrin qanunsuz dövriyyəsində şübhəli bilinən şəxslərin olduğu 77-XS-413 nömrəli “Toyota Prius” markalı avtomobilə polis əməkdaşları tərəfindən “saxla” işarəsi verilib.
Hərəkətini davam etdirən avtomobil Nəsimi rayonu ərazisində maneəyə dəyərək dayanıb.
Daha sonra qaçmaq istəyən əvvəllər məhkum olunmuş – 34 yaşlı Bəxtiyar İsmayılov və 44 yaşlı Əjdər Əjdərov polis əməkdaşları tərəfindən xidməti tabel silahı ilə xəbərdarlıq atəşi açılmaqla saxlanılıblar. Araşdırma zamanı avtomobildən müxtəlif çəkilərdə qablaşdırılan heroin, metamfetamin, güclü təsiredici dərman preparatları tapılıb.
Faktla bağlı cinayət işi açılıb. Araşdırmalar davam edir.
