Bakının Binəqədi rayonu, Gülüstan qəsəbəsində kustar üsulla gizli sexdə saxta spirtli içkilərin hazırlanmasında şübhəli bilinən 3 nəfər saxlanılıb. Bu haqda bu gün, 14 iyul tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Daxili İşlər Nazirliyi və Qida Təhlükəsizliyi Agentliyinin birgə apardıqları əməliyyat zamanı məlum olub ki, Fəxri Nürəddinli, Sərxan Manafov və Xəyyam Həsənov həmin sexdə araq, viski, tekila və sairə saxta spirtli içkilər hazırlayaraq Bakı şəhəri və respublikanın müxtəlif rayonlarında satışını təşkil ediblər.
Baxış zamanı xeyli sayda saxta spirtli içki, ancaq istehsalatda istifadəsi nəzərdə tutulan, insan sağlamlığına ciddi ziyan vura bilən texniki spirt, qablaşdırma üçün nəzərdə tutulmuş yerli və xarici aksiz markalar, etiketlər, boş şüşə qablar və sairə köməkçi vəsaitlər aşkar olunaraq maddi sübut kimi götürülüb.
Aparılmış ekspertiza nəticəsinə görə, aşkar edilən spirtli içkilər istifadəyə tam yararsızdır va insan sağlamlığı üçün olduqca təhlükəlidir. Faktla bağlı tədbirlər davam etdirilir.
