Bakının Nəsimi rayonunda özünü sərbəst güləş üzrə dünya çempionu kimi təqdim edən Məmmədağa Tağızadə onu işə götürən Ələkbər Qasımovu bıçaqlayıb. Bu haqda bu gün, 18 iyul tarixində Report məlumat verib.
Zərərçəkmişin bacısı Ramilə Bünyatovanın sözlərinə görə, qardaşı hoteldə bələdçi kimi işləyir. Bir neçə gün öncə Tağızadə onun qardaşına yaxınlaşaraq ondan iş istəyib. O, maliyyə çətinlikləri yaşadığını və güləş üzrə dünya çempionu olduğunu bildirib.
"Bu gün səhər saat 8 radələrində həmin şəxs qardaşımgilə gəlib. Qardaşım ona 70 manat pul uzadıb ki, maşınla turistləri filan yerə apar. Bundan sonra Ələkbər hamama əlini yumağa gedib. Elə həmin vaxt M. Tağızadə şüşə qabı onun başına vurub və bıçaqla boyun damarlarını kəsib. Qardaşıma deyib ki, mən bura sifarişlə gəlmişdim. Evdən onun 2700 dollar və 1000 manat pulunu da götürərək qaçıb. Qardaşım görüb ki, onu öldürəcək, pulun yerini deyib", - Bünyatova bildirib.
Hazırda əməli törədən şəxs axtarışdadır, Qasımov isə ağır xəsarətlər alıb. "Şəklinə yaxından baxmışam. Burnunun sınmasından bilinir ki, idmanla məşğul olub. 20 yaşı var, Salyan sakinidir. Evdən qaçanda Ələkbərin paltarlarını geyinib. Qardaşım xırıldayıb, Məmmədağa da bilib ki, o, ölüb. Ancaq şah damarını kəsməyib deyə, qardaşım sağ qalıb, başına tikiş qoyulub", - deyə Bünyatova əlavə edib.
Azərbaycan Güləş Federasiyasından verilən məlumata görə, bu adda sərbəst güləş üzrə dünya çempionu yoxdur.
Hadisə ilə bağlı araşdırma aparılır.
