Sabunçu rayonu, Zabrat qəsəbəsində 2020-ci il avqustun 28-də qəsdən adam öldürməyə cəhd hadisəsi ilə bağlı açılmış cinayət işi üzrə məhkəmə prosesi başa çatıb. Bu haqda 27 iyul tarixində Oxu.az məlumat verib.
Belə ki, 37 yaşlı Taleh və onun dostu ev tikintisi biznesi qurublar. Lakin bir müddət sonra Talehin Azərə xeyli miqdarda borcu yaranıb və onların münasibəti pozulub. Azər onu axtarmağa çalışsa da, Taleh yaşadığı mənzili dəyişdiyindən, onu tapmaqda çətinlik çəkib. Bundan sonra Azər Talehin həyat yoldaşının telefonuna yazmağa başlayıb və onların arasında münasibət yaranıb.
Məhkəmədə ifadə verən Azər Abbasov Talehin həyat yoldaşına onun yerini müəyyən etmək məqsədilə yazdığını deyib.
Taleh Əzizov məhkəmədə bildirib ki, həyat yoldaşı ilə Azər arasında münasibət olduğundan şübhələnib və qadını yoxlamaq üçün onun telefonuna proqram yükləyib. Nəticədə Taleh onların arasında sevgi münasibətinin olduğunu görüb. O, öz evinin yanında pusqu qurub və Azərin onun evinə, həyat yoldaşının yanına gəlməsini gözləyib. Azər evlərinə gəlib və çölə çıxanda Taleh ona arxadan bıçaq zərbəsi endirib. Daha sonra Taleh Əzizov Azərbaycanı gizli yolla tərk edib. İran sərhədçiləri onu yaxalayıb və 5 aya yaxın İranda həbsxanada qalandan sonra Azərbaycana təhvil verilib.
Talehin həyat yoldaşı Azərlə arasında sevgi münasibətinin yarandığını etiraf edib.
Əzizov Cinayət Məcəlləsinin “Qəsdən adam öldürməyə cəhd” və “Dövlət sərhədini qanunsuz keçmə” maddələri ilə təqsirli bilinib. Məhkəmənin hökmü ilə o, 7 il 10 ay 15 gün müddətinə azadlıqdan məhrum edilib.
