Fəhlə Bakıda fəaliyyət göstərən "Nasha Evenst" dekor şirkətindən külli miqdarda oğurluq edib.
Qaynarinfo-nun məlumatına görə, aparılan araşdırma zamanı oğurluğun 1994-cü ildə Goranboy rayonunda anadan olmuş Murad adlı şəxs tərəfindən törədilməsi məlum olub.
Murad "Nasha Events" dekor şirkətində qeyr-rəsmi şəkildə fəhlə işləyib. Şirkətin qanuni təmsilçisi Elməddin, direktoru isə onun həyat yoldaşı Nəzrin Abdullayevadır.
Nəzrin Abdullayeva şirkətin giriş qapısının açarını 2009-cu ilin dekabr ayından orda fəhlə işləyən Murada etibar edib. Sonuncu isə 10 dekabr 2022-ci il tarixdən 4 avqust 2023-cü il tarixədək icarəyə götürdüyü avtomobillə oradan ümumi dəyəri 130 min manat olan avadanlıq oğurlayıb. Hətta Murad öz müdirinin "Axus" firmasına aid idman qaçış aparatını, masaüstü kompüterini, bir ədəd sarı rəngli kreslosunu da oğurlayıb.
O, şirkətə ümumi dəyəri 127.691 manat məbləğində ziyan vurub.
Nəzrin Abdullayeva onlara dəyən zərərin ümumilikdə 130 min manatdan çox olduğunu deyib. Murad isə oğurladığı avadanlıqları Sabunçu bazarında və elan saytlarında dəyər-dəyməzinə satdığını bildirib.
Məhkəmənin qərarı ilə təqsirləndirilən şəxs Cinayət Məcəlləsinin 179.4-cü maddəsi ilə təqsirli bilinərək barəsində 10 il müddətinə azadlıqdan məhrumetmə cəzasına məhkum edilib.
