Bakıda tanışını elektrik cərəyanı ilə qorxudaraq ondan sənədlərə imza atmasını tələb edən şəxs barəsidə hökm oxunub. Bu haqda BakuPlus.az Qafqazinfo-ya istinadən bu gün, 29 iyul tarixində xəbər verir.
Hadisə cari il aprel ayının 16-da Nərimanov rayonu, Məmməd Araz küçəsindəki evdə baş verib.
Novxanı bağları massivində satışda olan 10 sot torpaq sahəsi və ərazidəki evi ələ keçirmək istəyən 61 yaşlı Ağa Ağayev plan qurub və hasarın üzərində yazılmış elandakı nömrəyə zəng edib.
Torpaq və evin sahibi olan Babək adlı şəxs mülkü 143 000 manata sata biləcəyini dedikdən sonra onlar razılaşıblar. Alqı-satqı ediləcəyi gün Babək Ağanı Nərimanov rayonu, Məmməd Araz küçəsindəki evinə dəvət edib.
Çantada pul olması görüntüsünü yaratmaq üçün içinə daş qoyan Ağa kustar üsulla hazırlanmış elektrik cihazını da özü ilə götürüb.
Qeyd olunan ünvanda görüş zamanı Ağa sənədlərə qol çəkdirmək üçün Babəki elektrikə verməklə hədələyib. Naqilin elektrik yuvasından çıxması ilə Babəklə onun arasında əlbəyaxa dava olub. Lakin ev sahibinin həyat yoldaşının səs-küyə gəlməsindən sonra Ağa niyyətini həyata keçirə bilməyib.
Hadisəni törədən Ağa Ağayev əvvəllər də dələduzluq əməlinə görə məhkum edilib.
Bakı Ağır Cinayətlər Məhkəməsinin 26 iyul 2022-ci il tarixli hökmü ilə ona 11 il 6 ay müddətinə həbs cəzası verilib.
