Bakıda gəlinini öldürərək meyitini doğrayan şəxs apellyasiya şikayəti verib. Bu haqda 17 yanvar tarixində Report məlumat verib.
2021-ci il yanvarın 27-də saat 01:00 radələrində Nəsimi rayonu 4-cü mikrorayon ərazisində zibil qutularından beş ədəd torbada doğranmış vəziyyətdə naməlum qadın meyitinin hissələri aşkar edilib. Araşdırma zamanı məlum olub ki, meyit 33 yaşlı Banı Xudayar qızına məxsusudur.
İstintaq-əməliyyat tədbirləri nəticəsində qətlin onun qayınatası, 76 yaşlı İdris Məhərrəmov tərəfindən törədildiyi müəyyənləşib. O, gəlininin baş nahiyəsindən çəkiclə vurub, çoxsaylı bıçaq zərbələri yetirərək, onu xüsusi amansızlıqla qəsdən öldürüb, daha sonra mətbəx bıçağı və balta ilə meyiti ayrı-ayrı hissələrə parçalayaraq torbalara yığıb və məişət tullantılarına atıb.
Məhərrəmov Cinayət Məcəlləsinin “Xüsusi amansızlıqla və ya ümumi təhlükəli üsulla adam öldürmə” və “Qəbir və ya meyit üzərində təhqiredici hərəkət” maddələri ilə ittiham olunub və Bakı Ağır Cinayətlər Məhkəməsinin hökmü ilə o, 18 il müddətinə azadlıqdan məhrum edilib.
Hökmdən narazı qalan məhkum apellyasiya şikayəti verib. Bakı Apellyasiya Məhkəməsində təqsirləndirilən şəxsin anket məlumatları dəqiqləşdirilib və Məhkəmənin baxış iclası yanvarın 27-nə təyin edilib.
