Bakıda narkotik vasitələrin satışını həyata keçirən biri qadın olmaqla 3 nəfər saxlanılıb. Bu haqda BakuPlus.az Daxili İşlər Nazirliyinə istinadən bu gün, 17 fevral tarixində xəbər verir.
Paytaxtın Nəsimi rayonunda saxlanılan şəxslərdən 5 kiloqramdan artıq müxtəlif xassəli narkotik vasitə və psixotrop maddə aşkarlanaraq qanunsuz dövriyyədən çıxarılıb.
Nəsimi polisinin keçirdiyi əməliyyat-axtarış tədbirləri nəticəsində narkotiklərin satışı ilə məşğul olan Elvin Hüseynov saxlanılıb. Onun üzərindən 5 kiloqram 10 qram heroin və narkotik vasitələrin satışında istifadə etdiyi elektron tərəzi aşkar olunub.
Polis əməkdaşlarının keçirdikləri digər əməliyyatlar zamanı paytaxt ərazisində narkotik vasitələrin satışı ilə məşğul olan Abşeron rayon sakini Şahin Qurbanov və Lalə Məmmədova saxlanılıblar. Onların üzərindən ümumilikdə 50 qrama yaxın heroin, metamfetamin və elektron tərəzilər aşkar edilib.
Araşdırmalardan məlum olub ki, saxlanılan şəxslər ölkə ərazisinə müxtəlif qanunsuz yollarla gətirilən narkotik vasitələri sosial şəbəkələr vasitəsilə əldə ediblər.
Faktlarla bağlı cinayət işləri başlanılıb.
