Sabunçu rayonunda ər arvadını qısqanclıq zəminində öldürüb. Bu haqda 4 avqust tarixində Bakuplus.az Milli.az-a istinadən məlumat verir.
Pirşağı qəsəbəsində 2021-ci il noyabrın 29-da 32 yaşlı Şəhriyar Ələsgərov rəsmi nikahda olduğu arvadı Ləman Ələsgərovanı qətlə yetirib. Belə ki, o, arvadının kirayə yaşadıqları evin yataq otağında tanışları Əlibala İbrahimovla mehriban söhbət etdiyini görüb, ona xəyanət etdiyinə əmin olub. Bu səbəbdən ov bıçağı ilə arvadının bədən səthinə 9 zərbə endirib. Ləman Ələsgərova aldığı xəsarətlərdən hadisə yerində keçinib.
Qonşuları olan şahid Əlibala İbrahimovun sözlərinə görə, Ləman Ələsgərova ilə yaxın münasibəti yaranıb, onunla cinsi əlaqədə olub. Hadisə zamanı Ləmanın uşaqları İbrahimovun evində olublar. Ləman əri Şəhriyar çöldə mübahisə edəndə, uşaqlarla birgə cizgi filminə baxırmış:
"Küçədə qışqırıq səsini eşitdim. Çölə çıxanda Şəhriyarın sağ əlində bıçağın olduğunu, artıq Ləmana xəsarətlər yetirdiyini gördüm. Həmin vəziyyətdə ona yaxınlaşmaqdan çəkindim, düşündüm ki, Şəhriyar məni də vura bilər. Tez evə qayıdıb, qapını bağladım. Şəhriyar qapını açmağımı və övladlarını verməyimi tələb etsə də, qapını açmadım. 5-10 dəqiqədən sonra Şəhriyar uzaqlaşdı. Ləmanın qonşu qapının qarşısında hərəkətsiz uzandığını gördüm".
“Hadisə günü bacım Mehriban mənə Ləmanla olan münasibətə son qoymağı deyib. Buna görə Ləman gilə getdim, onun yataq otağına girib, söhbət etdim. Ləman məni qucaqlayanda, çox güman ki, Şəhriyar görüb", - deyə İbrahimov əlavə edib.
Qətldən sonra, həmin gün Şəhriyar könüllü olaraq bölməyə gəlib və təslim olub. Bakı Ağır Cinayətlər Məhkəməsində o, “Xüsusi amansızlıqla qəsdən adam öldürmə” və “Qanunsuz olaraq soyuq silahı əldə etmə, satma və ya gəzdirmə” maddələri ilə tövsif olunub. Şəhriyar Ələsgərov cəzasını ciddi rejimli cəzaçəkmə müəssisəsində çəkməklə 16 il 6 ay müddətinə azadlıqdan məhrum edilib.
Ələsgərov Ləmanla 2013-cü ildə evlənib. Nikahdan 3 qız övladları dünyaya gəlib.
