Ərinin qətlini sifariş verməkdə təqsirləndirilən Əzizə Seyidova və qətlin icraçıları - Mehdi Məmmədli, Elnur Əliyev və Bəxtiyar Fərzəliyevin məhkəməsi davam etdirilib.
Bizim.Media məlumat yayıb ki, Bakı Ağır Cinayətlər Məhkəməsində hakim Siyavuş Hacıyevin sədrliyi ilə keçirilən prosesdə sənədlər tədqiq edilib.
Təqsirləndirilən Bəxtiyar Fərzəliyevin istintaqda verdiyi ifadəsi səsləndirilib. O, istintaqdakı ifadəsində bildirib ki, qətl zərərçəkmişin mülkünü ələ keçirməkdən ötrü olub.
Bəxtiyar Fərzəliyevin istintaqa verdiyi ifadə ilə məhkəmədə söylədikləri ziddiyyət təşkil edib. Bəxtiyar Fərzəliyevin iddiası ilə bağlı istintaqa verdiyi ifadəsinin yerində yoxlanması üçün çəkilən video məhkəmədə göstərilib. Videoda onun cinayətin təfərrüatları izah etdiyi əks olunub. B.Fərzəliyevin istintaq ifadəsi ilə videoda dedikləri üst-üstə düşüb.
Təqsirləndirilən şəxs buna da etiraz edib.
Təqsirləndirilən şəxs Mehdi Məmmədlinin ifadəsinin surətini imzaladığını iddia edib.
Prosesin davamında digər təqsirləndirilən Mehdi Məmmədlinin ifadəsi səsləndirilib. Onun hadisə ilə bağlı dedikləri B.Fərzəliyevin ifadəsi ilə eynilik təşkil edib.
M.Məmmədlinin istintaqa verdiyi ifadədə Əzizə Seyidovanın ona ərini öldürməsi qarşılığında Əli Seyidlidən keçəcək mülkü satıb onlara aralarında bölüşdürməsi üçün verəcəyini deyib.
Mehdi Məmmədli etiraz edərək heç bir mülk istəmədiyini, bu əməli qarşılıqsız törətdiyini söyləyib.
İfadənin səsləndirilməsi bitdikdən sonra Əzizə Seyidova vəsatət qaldıraraq mülk iddiasının yanlış olduğunu iddia edib.
Məhkəmə yerində müşavirə edərək vəsatətlərin baxılmamış saxlanılmasını qərara alıb. Növbəti iclas 5 noyabr tarixinə təyin edilib.
