Bakıda Türkiyə vətəndaşı təhdid edilib. Bu haqda 2 avqust tarixində Report məlumat verib.
Səbail rayon ərazisində yaşayan Türkiyə vətəndaşı Özgür Karataş polisə müraciət edərək bildirib ki, sosial şəbəkələrdə etdiyi paylaşımlara, yazdığı postlara görə həmyerlisi, eləcə də onun azərbaycanlı dostu tərəfindən təhdid olunaraq təzyiqlərə məruz qalıb.
Araşdırma zamanı məlum olub ki, Karataşın sosial şəbəkə hesabına həmyerlisi tərəfindən kiberhücumlar edilib, onun icazəsi və məlumatı olmadan hesabındakı videolar tam fərqli formatda və məzmunda ictimaiyyətə təqdim olunub. Bununla bağlı, zərərçəkmiş Türkiyədəki aidiyyəti qurumlara şikayət edərək təqsirkarın cəzalandırılmasını istəyib. Həmçinin həmyerlisinin dostu, Bakı sakini Habil Bəylərov ona zəng vurub və hədə-qorxu gələrək, şikayətini geri götürməyi tələb edib.
H.Bəylərov polis tərəfindən tapılıb və o, izahatında türkiyəli dostları ilə aralarında anlaşılmazlığın olduğunu, təhqir, habelə təhdid etmədiyini, sadəcə onları barışdırmaq niyyəti olduğunu bildirib. Əməlindən səmimi peşmanlıq hissi keçirdiyini etiraf edən H.Bəylərova qanunvericiliyin tələbləri izah edilib və onunla profilaktik söhbət aparılıb.
Tərəflərin razılığı əsasında araşdırma dayandırılıb və toplanmış materiallar işə alınıb.
