Sumqayıt-Bakı marşrutu ilə müntəzəm sərnişindaşıma həyata keçirən avtobuslardan birinin sürücüsü saxlanılıb. Bu haqda 28 iyul tarixində Qafqazinfo məlumat verib.
Sərnişin daşınması ilə məşğul olan 29 yaşlı Şamaxı rayon sakini “20 Yanvar” metro stansiyasının qarşısında dayanaraq yol hərəkəti qaydalarını pozub. Bu zaman yol polisi əməkdaşları sürücünü yol hərəkəti qaydalarını pozduğuna görə saxlayıb və sənədlərini tələb ediblər. Sürücülük vəsiqəsi və etibarnaməsi olmayan sürücü polisə müqavimət göstərməyə başlayıb.
Hadisə yerinə 19-cu polis bölməsinin əməkdaşları dəvət olunublar, sürücü saxlanılıb. Onun barəsində “Polisin qanuni tələbinə tabe olmama” maddəsi ilə protokol tərtib edilib.
Protokol Nəsimi rayon məhkəməsinə göndərilib. Məhkəmənin qərarı ilə sürücülük vəsiqəsi olmadan avtobus idarə edən şəxs 10 sutka müddətinə həbs edilib.
