14 il icra başçısı işləmiş Lütvəli Babayevin biznesmen oğluna qarşı dələduzluq etməkdə təqsirləndirilən şəxslər- Əliyev Aruz Mübariz oğlu və Kərimov Ehtiram Nazim oğlunun məhkəmə prosesinin hazırlıq iclası keçirilib.
Bizim.Media məlumat verir ki, Bakı Ağır Cinayətlər Məhkəməsində hakim Mahirə Kərimovanın sədrliyi ilə keçirilən prosesdə cinayət işində zərərçəkmiş qismində Lütvəli Babayevin oğlu Babəli Babazadə tanınıb.
Məhkəmədə onun nümayəndəsi vəkil Teymur Babayev iştirak edib.
İlk olaraq hakim təqsirləndirilən şəxslərin anket məlumatlarını dəqiqləşdirib.
Təqsirləndirilən şəxs Ehtiram Kərimov zərərçəkənin məhkəmədə iştirakını tələb edib, 8 aydır girov saxlanıldığını deyib. Ehtiram Kərimov fərdi bizneslə məşğul olduğunu məhkəmənin nəzərinə çatdırıb. Aruz Əliyevin isə "Uniklinika" klinikasında hazırkı zamana kimi baş həkim vəzifəsinin saxlanıldığı məlum olub. Hazırlıq iclasında Ehtiram Kərimovun müqavilə ilə vəkili iştirak etmədiyindən təqsirləndirilən şəxs məhkəmə prosesinin hazırlıq iclasının davam etdirilməsi 17 oktyabr tarixinə kimi təxirə salınıb.
Məlumata görə, Babəli Babazadənin dostu üçüncü şəxslə əlbir olaraq onun əmlaklarını 2 milyon manata sataraq pulunu mənimsəyiblər.
Məsələ burasındadır ki, bu hadisə baş verməzdən əvvəl B.Babayevin sahibi olduğu tikinti şirkətinin 1 milyon manat vergi borcu yaranıb. Bununla bağlı ona rəsmi məktub gəlib, verginin ödənilməli olduğu xatırladılıb. Bu məsələyə görə Babəli dostu Aruz Əliyevlə məsləhətləşib, ondan nə edə biləcəyini soruşub. Aruz Əliyev özü isə həkim-cərrahdır. O, bu cinayətin üstü açılana kimi “Uniklinika”nın baş həkimi olub.
İddia olunur ki, Aruz külli miqdarda vergi borcu yaranmış Babəliyə ölkədən çıxmasının lazım olduğunu deyib. O, tanışı Ehtiram Kərimovla əlbir olaraq eks-icra başçısının oğlunun Türkiyəyə qaçmasına nail olub.
Əsas hadisələr də bundan sonra başlayıb.
Babəli Türkiyədə yaşadığı müddətdə Bakıdakı əmlaklarını idarə etmək üçün Aruza etibarnamə verib. O, əmlakları satışa çıxarıb. Dediyinə görə, Aruz onun etibarından sui-istifadə edib. Aruz və Ehtiram Babəlinin Binəqədi rayonunda yerləşən yarımtikilisini və Nərimanov rayonundakı əmlakını ümumilikdə 2 milyon manata satıblar. Bundan sonra həmin pulu əmlakların sahibinə vermədən dələduzluq yolu ilə şəxsi mənafelərinə sərf ediblər.
Zərərçəkmiş şəxsin şikayəti əsasında baş həkim Aruz Əliyev və Ehtiram Kərimov polis əməkdaşları tərəfindən tutulub. Onlara dələduzluq maddəsinin ən ağır bəndi ilə ittiham irəli sürülüb, hər ikisi haqda həbs qərarı verilib.
İstintaq dövründə keçmiş icra başçısı Lütvəli Babayev də dindirilib. O, cinayət işi üzrə şahid qismində tanınıb.
Təqsirləndirilən şəxslər isə ittihamları qəbul etmirlər.
Onlar deyirlər ki, zərərçəkmiş əmlaklarını könüllü satdırıb, pulunu da Türkiyədə xərcləyib. İttiham olunan tərəfin iddiasına görə isə Babəli ailəsinin əmlakını satıb xərclədikdən sonra vəziyyətdən çıxmaq məqsədilə dostundan istifadə edib.
Digər məlumata görə, Babəli Türkiyəyə qaçmazdan əvvəl xırda xuliqanlığa görə 15 gün həbsdə qalıb. Buraxıldıqdan dərhal sonra isə ölkədən gedib.
