Bakıda qətl törətməkdə şübhəli bilinən üç qardaş hakim qarşısına çıxarılır. Bu haqda 30 iyul tarixində APA məlumat verib.
Sabunçu rayonunda bir nəfəri öldürən, digərinə xəsarət yetirən Rahib, Ramil və Qorxmaz Lətifovların cinayət işi üzrə ibtidai istintaq başa çatıb. İş üzrə toplanmış materiallar Bakı Ağır Cinayətlər Məhkəməsində hakim Zeynal Ağayevin sədrliyi ilə araşdırılacaq.
Sabunçu qəsəbəsində 2021-ci il noyabrın 27-də 25 yaşlı İrşad Əliyev və dostu, 22 yaşlı Fərid Əliyev Lətifov qardaşları tərəfindən bıçaqlanıblar. Hadisə nəticəsində Fərid Əliyev xəstəxanada ölüb.
Toplanmış sübutlarla Rahib Lətifov CM-in “Xuliqanlıq niyyəti ilə adam öldürmə”, “Xuliqanlıq niyyəti ilə adam öldürməyə cəhd”, “İki və ya daha çox şəxsi qəsdən öldürməyə cəhd” və “Silah qismində istifadə olunan əşyalar tətbiq etməklə xuliqanlıq etmə” maddələri ilə, Ramil və Qorxmaz Lətifovlar isə CM-in “Silah qismində istifadə olunan əşyalar tətbiq etməklə xuliqanlıq etmə” maddəsi ilə təqsirləndiriliblər.
