Şıx çimərliyində vətəndaşların telefonlarını və pulunu oğurlayan şəxslər saxlanılıb. Bu haqda 28 iyul tarixində Report məlumat verib.
Səbail rayonu, Şıx qəsəbəsinin dəniz çimərliyində Bakı şəhər sakini Ə.Sadıxovun mobil telefonu oğurlanıb. Polis əməkdaşlarının keçirdikləri əməliyyat tədbiri nəticəsində oğurluğu törətməkdə şübhəli bilinən Cəlilabad rayon sakini, əvvəllər məhkum olunmuş V.Əsədov tutulub.
Araşdırma zamanı məlum olub ki, Əsədov Şıx çimərliyində “Tofaş” markalı bir avtomobildən 150 manat pul və mobil telefon, bir qadının və bir kişinin çantalarından 3 ədəd mobil telefon, həmçinin Şuşa şəhər sakini E.Nərimanlı ilə birgə “Mercedes” markalı bir avtomobildən içərisində 1400 manat, bank kartı və sənəd olan pulqabını oğurlayıb.
Əməliyyat tədbirləri nəticəsində, həmçinin E.Nərimanlı saxlanılıb. Faktlarla bağlı araşdırmalar davam edir.
