Yasamalda 18 il əvvəl nənə və nəvəni öldürən şəxslərin məhkəməsi başlayır. Bu haqda 9 avqust tarixində APA məlumat verib.
Yasamal rayonunda 18 il əvvəl qətlə yetirilmiş və meyitlərinin üzərində çoxsaylı bıçaq xəsarətləri aşkar edilmiş 1947-ci il təvəllüdlü Rəhilə Cəlilovanın və nəvəsi, 1989-cu il təvəllüdlü Aygün Əzizovanın qatillərinin cinayət işinin ibtidai istintaqı Baş Prokurorluğun İstintaq idarəsində tamamlanıb.
Belə ki, Anar Ağalarov, qabaqcadan əlbir olduğu mərhum xalası oğlu Teymur Məmmədov və sonuncunun qardaşı Fərid Məmmədli ilə birlikdə quldurluq etmək məqsədilə 24 aprel 2004-cü il tarixində saat 18:30-da Rəhilə Cəlilovanın yaşadığı mənzilə daxil olub. Həmin vaxt onlar Aygün Əzizovanın da orada olduğunu görüblər və özləri ilə mətbəxdən götürdükləri bıçaqlarla çoxsaylı xəsarətlər yetirməklə Rəhilə Cəlilova və Aygün Əzizovanı xüsusi amansızlıqla qəsdən öldürüblər. Daha sonra mənzildə olan 2 milyon 951 min 400 manat (2004-cü ilin məzənnəsi ilə) və 600 ABŞ dolları məbləğində pul vəsaitini götürərək hadisə yerini tərk ediblər.
Toplanan sübutlar əsasında Anar Ağalarov və Fərid Məmmədli Cinayət Məcəlləsinin “Bir qrup şəxs tərəfindən qəsdən adam öldürmə”,
“Xüsusi amansızlıqla və ya ümumi təhlükəli üsulla adam öldürmə”,
“Başqa cinayəti gizlətmə və ya onun törədilməsini yüngülləşdirmə məqsədilə adam öldürmə” və digər maddələri ilə ittiham elan ediliblər.
Hazırda cinayət işi baxılması üçün aidiyyəti üzrə Bakı Ağır Cinayətlər Məhkəməsinə göndərilib.
