İyunun 18-də Bakıda, Dənizkənarı bulvarın ərazisində tatar milli bayramı Sabantuy keçiriləcək. Bu haqda bu gün, 16 iyun tarixində Bakuplus.az Report-a istinadən məlumat verir.
Festivalda tematik ərazilərlə tanış olmaq mümkün olacaq: “Baursak evi”nin həyətində çay otağı kimi hazırlanmış fotozona təqdim ediləcək. Ziyarətçilər orada tatar şirniyyatları, çay, keramika məhsulları ala və “baursak” adlı desertin dadına baxa bilərlər.
Mədəni tədbirin proqramına, həmçinin ustad dərsləri, xalq sənətkarlıq yarmarkası və müxtəlif müsabiqələr daxildir.
Sabantuy iştirakçıları zonalar üzrə idman-əyləncə oyunlarında da iştirak edə biləcəklər: tatar güləşi, küp sındırma, qaşıqla qaçış, kisədə qaçış, boyunduruqla qaçış və s.
Bayramın əsas səhnəsində isə Azərbaycan və Tatarıstan incəsənət ustalarının iştirakı ilə konsert olacaq. Tədbirə giriş pulsuzdur.
