“Asan imza"nın tam normal əsaslarla istifadə edilməsi imkanı təmin edilib.
Bu barədə apa.az-ın sorğusuna cavab olaraq Azercell-dən bildirilib:
"Asan imza" xidmətində bəzi əməliyyatların keçməsində müəyyən gecikmələr müşahidə olunurdu. Tərəfimizdən xidmətin fəaliyyətini təmin edən aidiyyəti qurumlar, tərəfdaş və xidmət təchizatçıları ilə dərhal əlaqə saxlanılıb. Görülmüş zəruri tədbirlər nəticəsində hazırda xidmətdən tam normal əsaslarla istifadə edilməsi imkanı təmin edilmişdir" - deyə açıqlamada qeyd olunub.
Qeyd edək ki, bir neçə gündür ölkədə “Asan imza” sistemi ilə bağlı problem yaranmışdı.
***
Artıq bir neçə gündür ki, “Asan imza” sistemi ilə bağlı problemlər yaranıb. Bu problemlə əlaqədar bankların, Dövlət Vergi Xidmətinin, Əmək və Əhalinin Sosial Müdafiəsi Nazirliyinin elektron xidmətlərindən istifadə etmək mümkün deyil.
İqtisadiyyat Nazirliyi yanında Dövlət Vergi Xidmətindən apa.az-ın sorğusuna cavab olaraq bildirilib ki, "Asan imza"da yaranmış çətinliklər Dövlət Vergi Xidməti ilə bağlı deyil.
Aidiyyəti qurumlar bəzi abunələrdə yaranmış çətinliklərin aradan qaldırılması ilə məşğuldur.
