Bakı-Sumqayıt dəmir yolu infrastrukturunda yenidənqurma işləri aparılacaq. Bu haqda bu gün, 26 fevral tarixində Bakuplus.az Report-a istinadən xəbər verir.
“Azərbaycan Dəmir Yolları” (ADY) QSC-nin sədri Rövşən Rüstəmov deyib ki, qatarların gecikməsinin əsas səbəbi köhnə infrastrukturdur. O, sərnişinlərə mane olmamaq və yolları yenidən qurmaq üçün plan hazırladıqlarını vurğulayıb.
“Biz infrastrukturu yeniləyərkən qatarın fəaliyyəti dayanacaq və sərnişinlər yenə şikayət edəcəklər. Bunun üçün də sərnişinlərin çox və az olduğu vaxtları nəzərə alıb, qatar intensivliyini aşağı salaraq planı reallaşdırmağa çalışacağıq”, – deyə QSC sədri qeyd edib.
Rövşən Rüstəmov sərnişin sıxlığı ilə bağlı da danışıb. O, səbəbi sərnişin sayının artmasında görüb.
“Ötən ilin əvvəlində gündəlik ortalama 24.000 sərnişin daşınırdısa, hazırda 30.000 sərnişinə xidmət göstərilir”, – deyə sədr əlavə edib.
