Milli Məclisin deputatı Mübariz Qurbanlı təklif edib ki, həyat yoldaşının işləməsinə icazə verməyən kişilərin maaşından pul tutularaq qadının pensiya fonduna köçürülsün.
Azərbaycan Demokrat Partiyasının (ADP) sədri Sərdar Cəlaloğlu modern.az-a açıqlamasında mövzuya münasibət bildirib.
O deyib ki, Azərbaycan Respublikasının Konstitusiyasına görə, qadınların kişilər kimi işləmək hüququ var:
“Əgər bir kşi zorla qadını işləməyə qoymursa, bu o deməkdir ki, Konstutisiyanın maddəsi pozulur. Bunun üçün xüsusi bir əlavə tədbirlərə ehtiyac yoxdur. Sadəcə olaraq Konstitusiyanın işləməsinə nəzarət olmalıdır. Amma bir evdə qadının işləməsinə ehtiyac yoxdursa, onu işləməyə məcbur etmək də bir o qədər qanun pozuntusudur. Mübariz Qurbanlının bu təklifini ailə münasibətlərinə müdaxilə kimi başa düşürəm”.
S.Cəlaloğlunun sözlərinə görə, əgər qadın həqiqətən də işləmək istəyirsə, əri də onu işləməyə buraxmırsa, bu beynəlxalq qadın hüquqlarının pozulmasıdır:
“Azərbaycan Beynəlxalq Qadın Hüquqlarının Qorunması Konvensiyasına qoşulub. Ona görə də burada qadının işləməsinə icazə verilməməsi hüququn pozulmasıdır. Konstutisiyanın 80-ci maddəsində göstərilir ki, Konstitusiya maddələrinin pozulması məsuliyyət yaradır. Həmin şəxsləri məsuliyyətə cəlb etmək lazımdır”.
S.Cəlaloğlu qeyd edib ki, ailə cinayətlərinin 90%-i qısqanclıq zəminində baş verir:
“Gənclər evlənərkən bir-birinin qarşısında öhdəlik götürməlidir. Bu gün Avropada ailə qurularkən müqavilə bağlanır. Tərəflər bir-birinin tələblərini oxuyur, tanış olur və bundan sonra evlilik aktı baş tutur. Bizdə evlənəndə heç kəs özünün əsl niyyətini demir. Gələcəkdə də problem yarananda boşanma baş verir. Mənə elə gəlir ki, müqaviləli ailə modeli bizdə də tətbiq edilməlidir. Qadın və kişi evlənmədən əvvəl şərtlərini bildirməli və bundan sonra ailə qurulmalıdır. Bəzi insanların belə hüquqları olduğundan xəbəri yoxdur.
Mübariz Qurbanlının dediyi edilə bilməz. Bu gün yol hərəkəti qaydalarının pozulması ilə bağlı astronomik cərimələr var. O cərimələr qanun pozuntularını azaldırmı?! Əksinə, dünyada harada aşağı cərimə varsa, orada cinayət az olur. İnsanlar könüllü şəkildə ailə qururlar. Onlar ailə qurmazdan əvvəl özləri şərtlərini bildirməlidirlər”.
