Bakıda toyda bıçaqlanma hadisəsi baş verib.
Bakuplus.az-ın əldə etdiyi məlumata görə, hadisənin istintaqı Bakı Ağır Cinayətlər Məhkəməsində keçirilib.
Belə ki, hadisədə təqsirləndirilən İsa Nəcəfov (ad şərtidir) 1988-ci ildə Bərdə şəhərində anadan olub. O, heç bir səbəb olmadan eyni toyda iştirak edən tanışı, zərərçəkmiş Adil Vəliyevi (ad şərtidir) bıçaqlayıb.
İsa Nəcəfov Azərbaycan Respublikası CM-nin 126.2.4-cü maddəsi ilə təqsirləndirilib.
Məhkəmədə təqsirləndirilən şəxs qismində dindirilən İsa Nəcəfov ona qarşı irəli sürülən ittiham üzrə özünü təqsirli bilməyib. O, ifadəsində göstərib ki, Adili bıçaqlamayıb:
“Hadisə günü anam və bacımla xalam oğlunun övladının məclisinə getmişdik. Dava düşdüyünü görüb, mübahisə edən şəxsləri sakitləşdirmək üçün oraya yaxınlaşdım. Lakin az sonra geri qayıtdım. Zərərçəkmiş Adil Vəliyev əvvəlcə mübahisənin getdiyi yerdən bir qədər uzaqlaşıb, az sonra geri qayıdaraq yerə yıxıldı. Məclisə gedən zaman üzərimdə bıçaq olmayıb. Adilə bıçaqla heç bir xəsarət yetirməmişəm”.
Zərərçəkmiş Adil Vəliyev məhkəmədəki ifadəsində deyib ki, onu kimin bıçaqladığını bilmir:
“Toyda qəfil kütləvi dava düşdü. Mən də aranı sakitləşdirmək üçün orada idim. Həmin vaxt kimsə məni bıçaqla vurdu. Lakin kimin vurduğunu görmədim. İsanın məni bıçaqla vurması barədə heç nə deyə bilmərəm. Qohumum Bəhruzun anası məni İsanın vurduğunu dedi”.
Daha sonra məhkəmə prosesində şahid Bəhruz Səfərov (ad şərtidir) ifadə verib:
“Bir çox restoranlarda ofisiant kimi çalışmışam. Təxminən 2 həftə idi ki, həmin şadlıq sarayında çalışırdım. Bıçaqlanma gözümün qabağında baş verdi. İsa Nəcəfov dava zamanı Adil Vəliyevi bıçaqladı”.
Tərəflərin çıxışından sonra məhkəmə müşavirəyə yollanıb. Sonda məhkəmənin qərarı ilə İsa Nəcəfov 8 il müddətinə azadlıqdan məhrum edilib. Bununla yanaşı 2.600 manat miqdarında cərimə cəzası verilib.
Fidan İlqar
