Bakıda xadimə ev sahibinin övladları üçün yığdığı pulları oğurlayıb. Bu haqda 9 avqust tarixində Kriminalqafqaz məlumat verib.
2022-ci ilin aprel ayında Rüstəm Hacıyevin (şərti) evində xadimə kimi çalışan 46 yaşlı Səkinə Məmmədova (şərti) müxtəlif vaxtlarda ailənin uşaqları üçün topladığı pulu az-az götürərək mənimsəyib. Xadimə ümumilikdə 8600 ABŞ dolları məbləğində pul oğurlayıb.
Məhkəmədə ifadə verən Səkinə Məmmədova bildirib ki, əməlindən peşmandır:
“Üç uşaq anasıyam. Həyat yoldaşım vəfat edib. 2019-cu ildən bəri bu ailənin evində çalışıram. Uşaqların otağını təmizləyərkən orada iki daxılın olduğunu gördüm. İçində pul var idi. Mən də uşaqlarımın ehtiyaclarını ödəmək üçün həmin puldan az-az götürməyə başladım. Daxılların ağzını maqqaşla açaraq hər dəfə 100, 200, 300 dollar götürmüşəm. Çox xahiş edirəm mənə yüngül cəza verilsin”.
Hadisə zamanı zərərçəkən ailə başçısı məhkəməyə verdiyi ifadəsində bildirib ki, xadimədən şikayətçi deyil:
“Ondan şikayətçi deyiləm. Zərəri tam ödəyib. Tək qadın olmasını və üç uşaq böyütməsini nəzərə almağınızı, ona yüngül cəza verməyinizi xahiş edirəm”.
Bakı Şəhər Səbail Rayon Məhkəməsinin hökmü ilə Səkinə Məmmədova CM-nin “Xeyli miqdarda ziyan vurmaqla oğurluq törədildikdə” maddəsi ilə təqsirli bilinərək 1 il 6 ay müddətinə azadlığın məhdudlaşdırılması cəzası təyin edilib. Ona elektron nəzarət cihazı tətbiq edilib və üzərinə daimi yaşadığı ərazini tərk etməməmək öhdəliyi qoyulub.
