Bakıda itkin düşən qadının sevgilisi həbs edilib. Bu haqda 11 avqust tarixində Qafqazinfo məlumat verib.
Yasamal Rayon Polis İdarəsinin əməkdaşları iyul ayında yoxa çıxan və axtarışına başlanılan D.İsmayılovanın (soyadı şərti) telefon zənglərini araşdırıblar.
Araşdırma zamanı məlum olub ki, İsmayılova 38 yaşlı F.Abbasəliyevlə (soyadı şərti) telefon vasitəsilə tanış olub və onunla gizli sevgi münasibəti yaşayıb. Polislər gecə saatlarında F.Abbasəliyevin yaşadığı evə gedərək onu bölməyə gətirmək istəsələr də, o, getməyəcəyini bildirib və polisə müqavimət göstərib.
Bundan sonra Abbasəliyev saxlanılıb və barəsində İnzibati Xətalar Məcəlləsinin “Polisin qanuni tələbinə qəsdən əməl etməmə” maddəsi ilə protokol tərtib edilərək, 15 sutka azadlıqdan məhrum edilib.
Məhkəmədə F.Abbasəliyev D.İsmayılova ilə münasibətini kəsdiyini bildirib:
“Özümü inzibati xəta ilə bağlı qismən təqsirli bilirəm, sərxoş olduğum üçün müəyyən hərəkətlər etmişəm. D.İsmayılova mənimlə birgə Göygöl rayonunda bir neçə gün qaldı. Sonradan onun ailəli olduğunu öyrəndiyim üçün ayrıldım və Bakı şəhərinə yola saldım. Hazırda D.İsmayılovaya görə polis bölməsinə dəvət edilməyimi düzgün hesab etmirəm”.
