Bakıda quldurluq edən şəxs məhkəmə qarşısına çıxarılıb. Bu haqda 11 avqust tarixində Kriminalqafqaz məlumat verib.
Bakı Ağır Cinayətlər Məhkəməsində quldurluğa görə 53 yaşlı Raiq İsmayılov 10 il müddətinə azadlıqdan məhrum edilib.
Belə ki, ötən il dekabrın 23-də Nizami rayonunda Ellər Muradov həyat yoldaşı Rəsmiyyə Muradova (soyadlar şərtidir) ilə birgə bankdan 12.000 manat pul götürərək küçəyə çıxıblar. Onlarla eyni zamanda bankda olan Raiq İsmayılov bunu görüb və həmin pulları ələ keçirmək istəyib. Bir qədər sonra Muradova yaxınlıqda yerləşən ticarət mərkəzindəki sanitar qovşağa daxil olub. İsmayılov onu izləyərək ardınca girib və içəridə heç kimin olmamasından istifadə edərək qadının daxil olduğu kabinənin qapısını açaraq arxadan yumruqla onun başından 5-6 dəfə zərbə endirib. Zərbələrin gücündən Muradova yerə yıxılıb, İsmayılov isə zərərçəkmişin cibindən sellofana bükülmüş pulları götürüb və qaçaraq ərazidən uzaqlaşıb.
Məhkəmədə verdiyi ifadəsində Raiq İsmayılov bildirib ki, onun 30.000 manata qədər borcu olduğuna görə cinayəti törədib:
“Həmin gün axşam o puldan borclu olduğum tikinti materialları mağazasını işlədən Fəridə 3000 manat, yaşadığım kənddə yem-arpa satan Tarverdiyə 5000 manat və mətbəədə işləyən Vahidə 2000 manat verdim və rayona qayıtdım”.
