Bakıda sevgilisinə xəsarət yetirən şəxs məhkum edilib. Bu haqda bu gün, 11 avqust tarixində Kriminalqafqaz xəbər verib.
Hadisə cari ilin iyul ayında Yasamal rayonu ərazisində baş verib. Malik Quliyev qeyri-rəsmi münasibətdə olduğu Nərmin Zahidovanın (ad və soyadlar şərtidir) işlədiyi “Era” adlı qadın gözəllik salonuna yaxınlaşaraq onu sağ əlindən sıxaraq tutub və nalayiq ifadələrlə təhqir edib. Yaxınlaşan polis əməkdaşları onları intizama dəvət ediblər. Lakin Malik polis əməkdaşlarının tələblərinə tabe olmayıb və özünü daha da aqressiv aparmağa başlayıb.
Daha sonra M.Quliyev Yasamal rayon polis idarəsinə aparılıb, onun işi baxılması üçün məhkəməyə göndərilib. Məhkəmənin qərarı ilə o, 20 sutka müddətinə inzibati həbs edilib.
