Son zamanlar Bakı və Abşeronda mənzillərin kirayə qiymətləri kəskin artıb. Bunu da mənzil fondunun yenilənməsi ilə əlaqələndirirlər.
Bəs görəsən, nə zamana qədər qiymət artımı olacaq?
Mövzu ilə bağlı Bakuplus.az-a açıqlama verən əmlak məsələləri üzrə ekspert Elnur Fərzəliyevin sözlərinə görə, artıq 2016-cı ildən başlayaraq Bakıda istismar müddətini bitirmiş və qəzalı vəziyyətdə olan köhnə çoxmənzilli yaşayış binaları və fərdi yaşayış evlərindən ibarət olan yaşayış massivləri sökülərək yeni tikili binalar ilə əvəzlənir:
“Bəzi ərazilər dövlət tərəfindən və dövlət ehtiyacı üçün alınır və alındığı zaman həmin ərazilərdə yerləşən fərdi yaşayış evləri müəyyən parklara, infrastrukturlara çevrilir. Sökülən hər çoxmənzilli yaşayış binasının yerində yeni binalar inşa olunur. Sökülən bina və fərdi yaşayış evlərində yaşayan sakinlərin evləri söküldüyü zaman onlar yeni tikili binalardan mənzillər alana qədər ortalama iki-üç il müddətinə məcburi kirayə çıxmalı olurlar. Nəticə etibarı ilə sökülən hər çoxmənzilli yaşayış binasının yerində yeni tikili binalar inşa olunduqca artıq kirayə mənzil bazarından ucuz kirayə mənzillər çıxmış olur”.
E.Fərzəliyev qeyd edib ki, 2040-ci ilə qədər paytaxt ərazisində hazırkı qiymətlərə olan əlçatan qiymətə kirayə mənzillər olmayacaq:
“Sökülən binaların yerində yeni binalar inşa olunduqca yeni tikili binalarda kirayə mənzillərin aylıq kirayə qiymətləri köhnə tikili binalardan təqribi iki dəfəyə qədər daha baha təklif olunur. Kommunal xərcləri də üzərinə gəlsək, kirayə qiymətinə 10 faiz təsir edir. Bu, onu deməyə əsas verir ki, 2040-ci ilə qədər paytaxt ərazisində hazırkı qiymətlərə olan əlçatan qiymətə kirayə mənzillər olmayacaq. Kirayə mənzillərinin aylıq qiymətlərində kəskin artımlar müşahidə olunacaq. Buna əsas səbəb köhnə binaların sökülərək yeni tikilən binalar ilə əvəzlənməsidir.
Kirayə qalan şəxslərin böyük əksəriyyəti bölgələrdən gələn tələbələrdir. Onlar kirayələrdə, mərkəz ərazilərdə əlçatan qiymətə mənzil tapmadıqlarına görə, Bakıətrafı ərazilərə üz tuturlar. Bu da tələbələrin gün ərzində bir neçə saatlarını tıxaclarda sərf etməsinə səbəb olur. Gələcəkdə tələbə yataqxanaları tikilərsə, tələbələr kirayə mənzillərdə deyil, yataqxanalarda qalarlarsa, bu, artıq tələbələrin ev problemini aradan qaldırmaqla bərabər, həmçinin kirayə mənzil bazarında boşluq yaradar”.
“Satış qiymətlərində də ciddi artımlar müşahidə olunur. Yəni bir əmlakın satış qiyməti 100 min manatdırsa, onun kirayə qiyməti 500 manat hesab olunur. 6-7 il əvvəl Yasamal, Nəsimi, Nərimanov rayonlarında bir sıra köhnə tikili binaların satış qiyməti 65-70 min manat idisə, hazırda 250-350 min manat arası dəyişir. Bu da kirayə qiymətlərinin artmasına gətirib çıxarır. Stabilləşmə üçün süni qiymət artımı stabilləşməlidir. Əhali sosial mənzillərlə təmin edilməlidir”, - deyə E.Fərzəliyev əlavə edib.
İqtisadçı eksperti Xalid Kərimli qeyd edib ki, kirayə mənzil bazarında qiymət artımı davam edəcək:
“Bakı və Abşeron yarımadasında qalmaq istəyənlərin sayı çoxalıb. İkinci tərəfdən isə bu ərazilərdə torpaqlar getdikcə məhdudlaşır. Bina tikintisinin xərcləri də artıb. 10 il bundan qabaqkı mənzillərin qiyməti ilə müqayisə etsək, ən azı iki dəfədən çox bahalaşma olduğunu görürük. Baha ev baha da kirayə mənzil deməkdir. 100 minlik ev alıb, 400 manata kirayə verirdisə, indi 200 minə alır, 800 manata kirayə verir. Evlərin qiyməti bahalaşdığına görə kirayələrin də qiyməti bahalaşıb.
Qiymətlərin artması prosesi dayanmır. Qiymətlər artdıqca, mərkəzi hissələrdə qiymətlərin artımı davam edəcək. O vaxt düşə bilər ki, insanlar Bakıya axın etməsinlər. Odur ki, qiymət enişini gözləmək qeyri-realdır. İqtisadi vəziyyət kəskin pisləşməsindən söhbət getməyəcək”.
Nəzrin Vahid
