Nərimanov rayon sakinləri “Baku city” MTK-dan şikayətçidirlər. Bu haqda 3 sentyabr tarixində Bakuplus.az RealTV-yə istinadən xəbər verir.
Əliəşrəf Əlizadə, 42/9 ünvanının köhnə sakinləri doğma binalarını əllərindən alan “Baku city” MTK-dan narazıdırlar. Belə ki, 2019-cu ildə onlara bildirilib ki, pilot layihə çərçivəsində yaşadıqları köhnə 3 mərtəbəli binaların yerində yeni çoxmənzilli yaşayış kompleksi tikiləcək və onlar burada mənzillə təmin olunacaqlar. Boş vədlər verərək, sakinlərlə müqavilə imzalayan MTK tikinti zamanı sakinləri evlərindən kirayə pulu verərək çıxarıb. Kirayə pulunun ödənişini isə 8 ay sonra dayandırıb.
Yeni binanın inşası tamamlanandan sonra onlara müqavilədə əksini tapmayan evlər və obyektlər təklif edilib. Sahəsi əvvəlkindən az, otaqları isə təmirsiz. Bununla razılaşmayan sakinləri isə tikinti şirkətinin işçiləri təhdid edərək fiziki zorakılıq göstəriblər. Sakinlər iddia edirlər ki, bu hadisələrdən sonra onlar müxtəlif xəsarətlər alıb və hətta xəstəlik tapıblar. Məhz bundan sonra onlara təklif edilən şərtlərlə razılaşmağa məcbur olublar.
Məsələ ilə bağlı “Baku city” MTK sakinlərin haqsız olduğunu və onların təklif olunan müqaviləyə öz istəyi ilə qol çəkdiyini bildirib. “Bu günə kimi 72 köhnə sakin yeni yaşayış kompleksinə köçürülüb və bu proses davam etməkdədir”, - deyə şirkət əlavə edib.
Bu, adıçəkilən tikinti şirkəti ilə yaşanan ilk problem deyil.
