Klublar qış transfer pəncərələrindəki fəaliyyətlərini başa vurmamış “Neftçi” yayın hazırlıqlarına başlayıb. Cari mövsümdə uğur qazanmaq üçün ümidini ölkə kubokuna bağlayan “ağ-qaralar” artıq yeni futbol ili ilə bağlı planlar qurur.
Publika.az-ın əldə etdiyi məlumata görə, Birləşmiş Ərəb Əmirliklərindən olan şirkətlə bağlanan sponsor anlaşması ilə maliyyə dayaqlarını 10 milyon manatdan çox gücləndirən paytaxt klubu yay transfer pəncərəsi ilə bağlı indidən hərəkətə keçib. Belə ki, “Neftçi” rəhbərliyi 2 futbolçu ilə anlaşıb. Söhbət boliviyalı Boris Kespedes və əlcəzairli Məhəmməd Belkheyrdən gedir.
Əslində bakılılar qış transfer pəncərəsində onları transfer etmək istəyib. “Ağ-qaralar”la yanaşı “Qarabağ” da hər iki futbolçunun xidmətində maraqlı olub. Lakin onların klubları müqavilələrinin sonuna 6 ay qalmasına rəğmən Azərbaycan təmsilçilərindən yüksək məbləğ tələb ediblər. Buna görə də transferlər reallaşmayıb.
Ağdam klubu hər iki futbolçunun yayda azad agent olmasını gözləməyə qərar versə də, “Neftçi” dinc dayanmayıb. Həm Kespedesin, həm də Belkheyrin müqavilələrinin sonuna 6 aydan az vaxt qaldığından paytaxt təmsilçisinin nümayəndələri futbolçuların menecerləri ilə birbaşa danışıqlar aparıb və razılıq əldə olunub. Hər iki futbolçu iyulda “Neftçi”nın sıralarına qoşulacaq.
Dayaq yarımmüdafiəçisi Boris Kespedes hazırda İsveçrə Superliqasında mübarizə aparan “Yverdon Sport”da çıxış edir. O, 2023-cü ildən bu klubun şərəfini qoruyur. 29 yaşlı futbolçu iki mövsüm ərzində 55 oyunda 12 qol vurub və 1 assist edib. Boris Boliviyadan olsa da, futbolçu karyerası İsveçrədən ibarətdir. Karyerası ərzində “Yverdon Sport”dan başqa “Servet”də çıxış edib. İsveçrənin aşağı yaş qrupları üzrə bütün milli komandalarında çıxış etsə də, seçimini Boliviyadan yana edib və millidə 19 oyunda 1 qol vurmağı bacarıb.
Hücumçu Məhəmməd Belkheyr isə icarə əsasında Belçikanın ikinci liqa təmsilçisi “Luvir”də çıxış edir. O, müqavilə ilə Niderlandın “Fortuna Sittard” klubuna məxsusdur. 26 yaşlı forvard cari mövsümdə 22 oyunda 12 qol vurub və 2 assist edib. Karyersı ərzində Əlcəzairin aşağı yaş qrupları üzrə bütün milli komandalarında forma geyinib. O, İtaliya klublarının aşağı yaş qrupları üzrə komandalarında - “Verona”, “İnter” və “Breşiya”da çıxıb edib. Portuqaliyanın “Sanjoanense”, “Leyşonş”, “Vilafranquense” klublarında top qovduqdan sonra Niderlanda - “Fortuna Sittard”a üz tutub.
