Bakıda piyadaların xəsarət alması ilə nəticələnən yol qəzaları baş verib. Bu haqda Report xəbər verib.
Paytaxtın Nərimanov rayonunda 26 yaşlı Həsən Qəhrəmanov yolu keçmək istəyərkən onu avtomobil vurub. Xəstəxanaya aparılan yaralıya qapalı müştərək travma və sağ sirkə kasasının yerdəyişən qəlpəli sınıqları diaqnozları qoyulub.
Yasamal rayonu Mətbuat prospektində avtomobil yolu keçən 32 yaşlı Əvəz Məmmədovu vurub. O, təcili tibbi yardımın köməyi ilə xəstəxanaya çatdırılıb. Məmmədova müayinə zamanı bədənin müştərək travması diaqnozu qoyulub.
Daha bir oxşar hadisə paytaxtın Binəqədi rayonunda baş verib. Rayon ərazisində "VAZ-2104" markalı avtomobil yolu keçən 25 yaşlı Səbinə Həsənovanı vurub. 3 saylı Şəhər Klinik Xəstəxanasına çatdırılan yaralı əməliyyat olunub və reanimasiya şöbəsinə yerləşdirilib.
Faktlarla bağlı araşdırmalar aparılır.
