Bakıda qayınatasını qətlə yetirən şəxsin məhkəməsi başlayıb. Bu haqda 17 yanvar tarixində Report xəbər verib.
Binəqədi rayonu, Biləcəri qəsəbəsində 31 avqust 2020-ci ildə 24 yaşlı Ayxan Hüseynəliyevin qayınatası, 55 yaşlı Xalıq Bağırovu bıçaqlayaraq öldürüb. Ayxan şəxsi münasibətlər zəminində aralarında yaranmış münaqişə zamanı əvvəl qayınatasının boğazını kəsib, ümumilikdə isə 14 bıçaq zərbəsi vurub. Qonşunun gəldiyini görən Ayxan hadisə yerindən qaçıb.
O, Cinayət Məcəlləsinin “Xüsusi amansızlıqla və ya ümumi təhlükəli üsulla adam öldürmə” maddəsi ilə ittiham olunub və Bakı Ağır Cinayətlər Məhkəməsinin hökmü ilə o, 18 il müddətinə azadlıqdan məhrum edilib.
Hadisədən üç ay əvvəl Hüseynəliyev Sumqayıt şəhərində öz həyat yoldaşını yandıraraq öldürmək istəyib. Bildirilib ki, həmin vaxt qadın hadisə yerindən qaçıb və itkin düşüb.
Ayxan Hüseynəliyev apellyasiya şikayəti verib və şikayəti üzrə məhkəmə iclası başlayıb. Proses zamanı təqsirləndirilən şəxsin anket məlumatları dəqiqləşdirilib. Məhkəmənin baxış iclası yanvarın 27-nə təyin edilib.
