Bakı şəhəri 28 və 29 noyabr tarixlərində 4 yanğın hadisəsi qeydə alınıb. Bu haqda Fövqəladə Hallar Nazirliyinin (FHN) mətbuat xidməti məlumat verib.
28 noyabr tarixində gecə saat 03:00 radələrində Binəqədi rayonunda məcburi köçkünlərin məskunlaşdığı beşmərtəbəli binada yanğın baş verib. Belə ki, ikinci mərtəbənin pilləkən qəfəsində elektrik kabeli yanıb. Nəticədə yaxınlığındakı mənzillər tüstü ilə dolub. 20 sakin yanğınsöndürənlər tərəfindən təxliyə edilib, yanğın söndürülüb. Mənzillər yanğından mühafizə olunub. Xəsarət alan olmayıb.
Saat 08:00 radələrində həmin rayonun ərazisində dəmirçi sexinin içərisində olan avadanlıq və 2 elektrik açarı yanıb. Sexin dam örtüyünün taxta atmaları qarsalanıb. Yanğın FHN əməkdaşları tərəfindən söndürülüb.
Bu gün, saat 03:00 radələrində Nəsimi rayonunun beşmərtəbəli binasının zirzəmisində olan dərzi sexində əşyalar və tikiş maşını yanıb.Sexin lambirindən ibarət olan tavanı əriyib. Alışma yanğınsöndürmə briqadası tərəfindən söndürülüb.
Saat 08:00 radələrində Səbail rayonunda yerləşən ikimərtəbəli elektrik yarımstansiyasının 1-ci mərtəbəsində transformatorun çıxış kabeli yanıb. Digər qurğular və kabellər yanğınsöndürmə briqadası tərəfindən yanğından qorunub.
