Binəqədi rayonu, Mir Cəlal küçəsi 11 ünvanında yerləşən binanın blokunda 8 may tarixində jurnalist Aytən Məmmədovaya bıçaqla hücum edilib. Bu haqda bu gün, 9 may tarixində Report məlumat verib.
Aytən Məmmədova yaşadığı evin girişində hücuma məruz qalıb. Liftə onun arxasınca girən kişi bıçağı onun boğazına dayayıb və adı açıqlanmayan məhkəmə prosesinin işıqlandırılmamasını tələb edib.
Hücum edən şəxs Məmmədovanı yaralayaraq hadisə yerindən qaçıb.
Daxili İşlər Nazirliyinin mətbuat xidmətindən bildirilib ki, artıq hadisə ilə bağlı onlara məlumat verilib və araşdırmalara başlanılıb.
16:10 - Yenilənib
Aytən Məmmədova Bakı şəhər Baş Polis İdarəsinə çağırılaraq dindirilib. Ona bütün zəruri tədbirlərin görüldüyü bildirilib. Bu haqda bu gün, 9 may tarixində Daxili İşlər Nazirliyinin İctimaiyyətlə əlaqələr şöbəsinin rəisi Elşad Hacıyev məlumat verib.
