Bakının Sabunçu rayonu, Pirşağı qəsəbəsində qumbara partladan kişi barəsində cinayət işi başlanılıb. Bu haqda bu gün, 25 avqust tarixində Azərbaycan Respublikası Baş Prokurorluğunun mətbuat xidməti məlumat verib.
Faktla bağlı Sabunçu Rayon Prokurorluğunda Cinayət Məcəlləsinin “Xüsusi amansızlıqla və ya ümumi təhlükəli üsulla adam öldürməyə cəhd”, “İki və ya daha çox şəxsi öldürməyə cəhd” və “Qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə” maddələri ilə cinayət işi başlanıb.
İntizam Nəcəfov şübhəli şəxs qismində saxlanılıb. Cinayət işi üzrə istintaq tədbirləri davam edir.
Daha öncə məlum olub ki, Ağdam rayon sakini, 39 yaşlı İntizam Nəcəfov keçmiş həyat yoldaşının anası və uşaqları ilə yaşadığı evə gəlib və onları öldürəcəyi ilə hədələyərək evin həyətində əl qumbarası partladıb. Hadisə yerinə gələn polislər onunla profilaktik söhbət etdikdən sonra o, yenə həyətdə qumbara partladıb. Hadisə yerində xəsarət alan və yaxud ölən olmayıb.
