Bakıda polis narkotik vasitələrin qanunsuz dövriyyəsinə qarşı əməliyyatlar keçirib. Bu haqda 12 fevral tarixində Daxili İşlər Nazirliyi məlumat verib.
Əməliyyat nəticəsində Nəsimi, Səbail, Binəqədi rayonlarında narkotik vasitələrin satışı ilə məşğul olan 4 nəfər saxlanılıb, 4 kiloqramdan artıq müxtəlif xassəli narkotik vasitə və psixotrop maddə qanunsuz dövriyyədən çıxarılıb.
Nəsimi rayonunda polis əməkdaşlarının həyata keçirdikləri əməliyyatlar zamanı narkotiklərin satışı ilə məşğul olan Vəli Rüstəmov və Ağasəf Bəhmənov saxlanılıblar. Onlardan 1 kiloqramdan artıq heroin, metamfetamin, tiryək və narkotiklərin satışında istifadə etdikləri elektron tərəzi aşkar olunub.
Səbail rayonunda narkotik vasitələrin satışı ilə məşğul olan, əvvəllər məhkum olunmuş Tərtər rayon sakini Anar Babayev tutulub. Onun üzərində və yaşadığı evdə ümumilikdə 2 kiloqram 260 qram narkotik vasitə heroin və psixotrop maddə metamfetamin tapılıb.
Polisin keçirdiyi növbəti əməliyyat zamanı Binəqədi rayonunda əvvəllər məhkum olunmuş Salyan rayon sakini Emin Quliyev saxlanılıb. Onun üzərindən və yaşadığı evdən 1 kiloqram 70 qram heroin və narkotiklərin satışında bilavasitə istifadə etdiyi elektron tərəzi aşkar olunub.
Faktlarla bağlı Cinayət Məcəlləsinin müvafiq maddəsi ilə cinayət işləri başlanılıb. Saxlanılanlar barəsində həbs qətimkan tədbiri seçilib.
