Bir neçə gün əvvəl Səbail rayonu, İçərişəhər Tarixi Memarlıq Qoruğunun ərazisində insident baş verib. Bu haqda BakuPlus.az Qafqazinfo-ya istinadən bu gün, 27 avqust tarixində xəbər verir.
Qoruq ərazisində polis əməkdaşı Murad Quluzadə (ad və soyad şərtidir) buruntaqsız “Stuff” cinsi iti gəzdirən 4 gəncə (3 oğlan və 1 qız) yaxınlaşıb. O, gənclərə bu barədə irad bildirib və İçərişəhərdə bu formada it gəzdirməyin qadağan olduğunu vurğulayıb.
Bu zaman gənclər əvvəlcə itin təhlükəsiz olduğunu deyiblər. Polis əməkdaşı onlardan tələbini davam etdirincə, “Bizim kim olduğumuzu bilirsən?!”, deyərək münaqişə yaradıblar. Mübahisə zamanı polis əməkdaşını yerə yıxan gənclər bölməyə gətirilib.
Həmin şəxslərin Dağıstan Dövlət Universitetinin İqtisadiyyat fakültəsinin tələbəsi, 2003-cü il təvəllüdlü Yusif Nəbiyev, onun qardaşı, 1999-cu il təvəllüdlü Oqtay Nəbiyev və Cəmil adlı dostları olduğu müəyyən edilib.
Onların barəsində İnzibati Xətalar Məcəlləsinin 535-ci (Polisin qanuni tələbinə qəsdən əməl etməmə) maddəsi ilə inzibati protokol tərtib edilib.
Daha sonra gənclər Səbail Rayon Məhkəməsinə göndərilib və məhkəmənin qərarı ilə Yusifə 20, qardaşı Oqtaya 10, Cəmilə isə 8 sutka həbs cəzası verilib.
Onlarla birgə olan qız isə sərbəst buraxılıb.
