Bakıda gənc oğlan ona uşaqlıqdan əzab verən atasını öldürüb. Bu haqda 12 sentyabr tarixində Oxu.az məlumat verib.
Bakıda atasını qətlə yetirməkdə təqsirli bilinən Cahangir Şükürlünün cinayət işi üzrə məhkəməsi olub. O, CM-in “Xüsusi amansızlıqla qəsdən adam öldürmə” və “Köməksiz vəziyyətdə olan adamı qəsdən öldürmə” maddələri ilə 14 il müddətinə azadlıqdan məhrum olunub.
Belə ki, 2021-ci il fevralın 13-də Balaxanı qəsəbəsində evin həyətində üzərində zorakılıq əlamətləri olan 51 yaşlı Cavanşir Şükürovun meyiti aşkarlanıb. Polisin apardığı araşdırma zamanı məlum olub ki, 22 yaşlı Cahangir Şükürlü münaqişə zəminində atasını bıçaqlayaraq öldürüb.
Məhkəmə zamanı Cahangir bildirib ki, uşaqlıq illərindən etibarən atası mütəmadi olaraq spirtli içki qəbul edib, ailə üzvlərini incidib, anasını döyüb:
“Atamın əxlaqsız hərəkətləri yadıma düşdüyü üçün ona nifrət edirdim. Son dəfə atam içkili vəziyyətdə evdə qardaşımla mübahisə edib, daha sonra ailəmizin digər üzvlərini evdən qovmaq məqsədilə polisə zəng vurub. Artıq qərara gəldim ki, atama layiqincə cavab verəcəm. Mağazadan mətbəx bıçağı alaraq, onu evlərimizin yanında, dalandakı borunun içərisində gizlətdim”.
Cahangir fevral ayının 13-də borudan bıçağı götürərək evə gəlib və darvazanın yanında atasını görərək, bıçaqla onun boynuna ilk zərbəni vurub. Daha sonra ardıcıl olaraq başına, boynuna və bədəninin digər nahiyələrinə xəsarətlər yetirib.Təxminən 5-6 zərbədən sonra Cahangir atasının öldüyünü görüb və hadisə yerindən uzaqlaşıb.
Zərərçəkmiş şəxsin hüquqi varisi Mehman Şükürov ifadəsində göstərib ki, qardaşı Cavanşir spirtli içki aludəçisi olub. O, qardaşı oğlunu bağışladığını bildirərək ona mümkün qədər yüngül cəza təyin edilməsini xahiş edib.
