Binəqədidə narkotik vasitənin təsiri altında avtomobil idarə edən şəxs saxlanılıb. Bu haqda BakuPlus.az Report-a istinadən bu gün, 28 may tarixində xəbər verir.
Mayın 27-də saat 01:00 radələrində Binəqədi rayonu, Xocəsən yolunda "VAZ-2121" markalı avtomobilin sürücüsü manevr qaydalarını kobud şəkildə pozduğuna görə Baş Dövlət Yol Polisi İdarəsinin əməkdaşları tərəfindən saxlanılıb.
Bu zaman onun narkotik vasitədən istifadə etməsi barədə şübhə yarandığından, sürücü tibbi müayinədən keçməyə dəvət olunub.
Lakin o, tabesizlik göstərərək avtomobilə əyləşib və yüksək sürətlə qarşı zolağa çıxaraq qarşıdan gələn nəqliyyat vasitələrinə və piyadalara təhlükə yaradıb.
Sürücü süni tıxac vasitəsilə saxlanılıb. Onun Bakı şəhər sakini Emin Əmirəliyev olduğu və avtomobili narkotik vasitənin təsiri altında idarə etdiyi müəyyən olunub.
Sürücü, əməllərində avtoxuliqanlıq hərəkətləri olduğu üçün Binəqədi Rayon Polis İdarəsinə təhvil verilib.
