Bakıda sərxoş kişi arvadını dabankeşlə döyüb. Bu haqda 6 sentyabr tarixində Oxu.az məlumat verib.
Nərimanov Rayon Məhkəməsində arvadını döyməkdə təqsirləndirilən Sərdar Səmədovun (şərti ad) cinayət işi üzrə məhkəmə iclası yekunlaşıb. Onun CM-in “Qəsdən sağlamlığa az ağır zərər vurma” maddəsi ilə təqsirləndirilməsinə dair məhkəməyədək sadələşdirilmiş icraata xitam verilib və o, cinayət məsuliyyətindən azad edilib.
Belə ki, hadisə 2022-ci ilin iyul ayının 30-da baş verib. Sərxoş vəziyyətdə olan Səmədov qısqanclıq zəminində arvadı Fəridə Səmədova (şərti ad) ilə dava edib. Dava zamanı Sərdar qadının saçından tutub və evdə olan dəmir dabankeşlə bir neçə dəfə onun bədəninin müxtəlif nahiyələrinə xəsarətlər yetirib.
Məhkəmənin hazırlıq iclasında Sərdar Səmədov özünü təqsirli bilib, zərərçəkmiş şəxs ilə barışdığını və ona vurduğu ziyanı tam olaraq ödədiyini söyləyərək iş üzrə icraata xitam verilməsini xahiş edib.
Zərərçəkmiş şəxs Fəridə Səmədova da təqsirləndirilən şəxsin dediklərini təsdiq edərək hazırda onunla barışdığını, ona dəymiş ziyanın tam şəkildə ödənildiyini, bununla da ərinə qarşı şikayət və tələbinin olmadığını bildirib.
