Binəqədi Rayon Polis İdarəsinin 40-cı Polis Bölməsinin əməkdaşları qayınatasının evində atəş açan kişini saxlayıblar. Bu haqda bu gün, 15 iyul tarixində Report məlumat verib.
İyulun 12-də Müşfiqabad qəsəbəsində yaşayan B.Xudamovun evinin divarına ov tüfəngindən 2 atəş açılması barədə polisə məlumat daxil olub.
Polis tərəfindən müvafiq tədbirlər görülüb. Aparılmış istintaq hərəkətləri əsasında müəyyən edilib ki, xuliqanlıq zəminində bu əməli Qobustan rayon sakini B.Xudamovun kürəkəni, əvvəllər məhkum olunmuş F.Dəmirov törədib.
Keçirilən əməliyyat-axtarış tədbirləri nəticəsində Dəmirov polis əməkdaşları tərəfindən saxlanılıb. Ondan lüləsi və qundağı kəsilmiş ov tüfəngi və 7 ədəd patron götürülüb. Faktla bağlı araşdırma aparılır.
