Bakıda polis bölməsinə sərxoş halda gələn qadın müəllim barəsində inzibati protokol tərtib edilib. Bu haqda BakuPlus.az Qafqazinfo-ya istinadən bu gün, 27 iyul tarixində xəbər verir.
Bir neçə gün əvvəl “102” xidmətinə etdiyi müraciətlə bağlı Binəqədi Rayon Polis İdarəsinin 4-cü Polis Şöbəsinə dəvət olunan 37 yaşlı Arzu Ağayeva (ad və soyad şərtidir) idarə etdiyi “Mazda” markalı avtomobillə sərxoş halda şöbəyə gedib və burada polislə arasında narazılıq baş verib.
Nəticədə şöbəni tərk etməyə qərar verən A.Ağayeva içkili halda həyətdəki maşını idarə edərək uzaqlaşmağa çalışıb.
Bu zaman o, maşını şöbənin pilləkəninə vuraraq oranı dağıdan müəlliməni Binəqədi DYP-nin əməkdaşları saxlayaraq geri qaytarıblar və o, alkotestdən keçirilərək sərxoşluğu rəsmiləşdirilib.
37 yaşlı müəllim barəsində İnzibati Xətalar Məcəlləsinin 535-ci (Polisin qanuni tələbinə tabe olmama) və 511-ci (Xırda quliqanlıq) maddələri ilə protokol tərtib edərək onu məhkəməyə göndəriblər.
A.Ağayeva məhkəmə prosesi zamanı hadisəni belə təsvir edib: “Baş vermiş bu hadisədən əvvəl yaşadığım evin qarşısında tanımadığım qadın tərəfindən döyülməyimlə bağlı 102-yə məlumat vermişdim. Məlumat verdikdən sonra baş vermiş hadisənin təsirində olduğum üçün iki badə şərab içmişdim. Təxminən bir-iki saat keçdikdən sonra 4-cü Polis Şöbəsindən zəng gəldi və izahat vermək üçün şöbəyə dəvət edildim. Əvvəlcə saatın gec olduğunu bildirərək etiraz etdim, lakin polis əməkdaşı izahat vərmək üçün elə indi şöbəyə yaxınlaşmalı olduğumu bildirdi. Oğlumla birlikdə idarə etdiyim “Mazda” markalı avtomobillə 4-cü Polis Şöbəsinə getdim. Polisə izahat verərkən məndən spirtli içki qəbul edib-etmədiyimi soruşdu və bu zaman aramızda mübahisə yarandı. Polis zabiti içkidən istifadə edərək polis şöbəsinə gəlməyimi nöqsan tutdu və Yol Patrul Xidmətinin əməkdaşlarını çağırdı. Həmin polis zabiti və YPX-nin əməkdaşı olan Nicat adlı şəxs məni videoçəkiliş aparacaqları ilə qorxutdular, şöbəyə kanallardan birini dəvət edib çəkiliş aparacaqlarını dedilər. Özümü itirib otaqdan çıxdım və avtomobilə mindim. Həmin an avtomobili arxaya verərkən ehtiyatsızlıqdan şöbənin giriş pilləkənlərinə dəyərək bir neçə pilləkəni sındırdım. Bu zaman YPX əməkdaşı mənə “dayan” əmri verdi. Sərxoşluq dərəcəsini yoxlamaq üçün məni tibbi müayinəyə, avtomobili isə cərimə meydançasına apardılar”.
O, əlavə edib ki, ictimai qaydanı pozmaq, şöbənin əmlakına ziyan vurmaq fikri olmayıb.
Binəqədi Rayon Məhkəməsi A.Ağayevanın əməlində İXM-nin 535-ci maddəsinin tərkibi olmadığından həmin maddəyə xitam verib. A.Ağayeva 510-cu maddə üzrə təqsirli bilinərək ona 50 manat inzibati cərimə təyin edilib.
