Nizami rayon məhkəməsi paltarını ütüləmədiyi üçün arvadını döyən kişi ilə bağlı qərar verib. Bu haqda 7 sentyabr tarixində Bakuplus.az Qaynarinfo.az-a istinadən xəbər verir.
Nizami rayonunda avqust ayının 6-da Murad (ad şərtidir) keçmiş həyat yoldaşı Xatirədən (ad şərtidir) onun paltarını ütüləməsini xahiş edib, lakin arvadı bunu etmədiyinə görə aralarında mübahisə düşüb. Mübahisə zamanı Murad qadının ünvanına nalayiq ifadələr işlədib, döşəmə taxtası ilə onun sol qolundan, təpiklə isə ayaq nahiyəsindən vurub. Qadın sol bazunun hemotoması və sıyrığı, hər iki baldırın xəsarətləri ilə xəstəxanaya yerləşdirilib.
Hadisədən dərhal sonra Murad saxlanılıb və barəsində Cinayət Məcəlləsinin “Qəsdən sağlamlığa yüngül zərər vurma” maddəsi ilə cinayət işi açılıb. Məhkəmə iclasında zərəçəkmiş bildirib ki, artıq əri ilə barışıb və məhkəmədən cinayət təqibinə xitam verilməsini xahiş edib. Təqsirləndirilən şəxs törətdiyi əməli etiraf edib.
Sonda məhkəmənin qərarı ilə Murad cinayət məsuliyyətindən azad edilib və barəsində olan sadələşdirilmiş icraat materialının icraatına xitam verilib. Murad yalnız ona məhkəmədə 2 saat ərzində göstərilən pulsuz hüquqi yardıma görə 12 manat ödəyib.
