Bakının Nizami rayonunda anasını qətlə yetirməkdə təqsirləndirilən İdeal Məmmədzadənin ibtidai istintaqı başa çatdıqdan sonra məhkəməyə göndərilib. Bu haqda bu gün, 23 avqust tarixində Report məlumat verib.
Məhkəmə prosesi Bakı Ağır Cinayətlər Məhkəməsinin hakimi Rasim Sadıxovun sədrliyi ilə aparılacaq.
Daha öncə məlum olub ki, 15 yaşlı İdeal Məmmədzadə 20 aprel tarixində "Neftçilər" metro stansiyasının yaxınlığında anası, 37 yaşlı Ülviyyə İsmayılovaya bir bıçaq zərbəsi (mətbəx bıçağı ilə) endirmişdir. Anası qışqıraraq qaçdıqda o, ikinci bıçaq zərbəsini də vurmuş, daha sonra məktəbli çantasını və hadisəni törətdiyi bıçağı kənara ataraq qaçmışdır. Qısa müddət sonra qadın hadisə yerində dünyasını dəyişmişdir.
İdeal Məmmədzadəyə qarşı Cinayət Məcəlləsinin “Qəsdən adam öldürmə” maddəsi ilə ittiham irəli sürülüb.
