Paytaxtın müxtəlif rayonlarında dəm qazından zəhərlənmələr qeydə alınıb. Bu haqda bu gün, 9 fevral tarixində Report məlumat yayıb.
Binəqədi rayonunda bir ailənin 8 üzvü, o cümlədən 16 yaşlı yeniyetmə və 8, 6, 1 yaşlı uşaqlar xəstəxanaya yerləşdirilib. Zəhərlənmə onların yaşadıqları evdə qeydə alınıb.
Nizami rayonunda 31 yaşlı Fəridə Əmirova və onun azyaşlı övladları - 7 yaşlı Almaz Əmirova, 9 yaşlı Banu Əmirova yaşadıqları evdə dəm qazından zəhərləniblər. Hər üç nəfər təcili tibbi yardımın köməkliyi ilə xəstəxanaya çatdırılıblar.
Daha yeddi zəhərlənmə hadisəsi Sabunçu rayonu ərazisində qeydə alınıb. Belə ki, M.Məlikov küçəsində 13 yaşlı Aylin Hüseynli, Ramananın “Südçülük sovxozu” adlanan ərazisində 40 yaşlı Gülnar Nəcəfova, Maştağa qəsəbəsində 22 yaşlı Aidə Allahverdiyeva və Bakıxanov qəsəbəsində 23 yaşlı Aygül İsmayılova yaşadıqları evlərində dəm qazından zəhərləniblər.
Həmçinin, Yeni Ramana qəsəbəsində yaşayan 32 yaşlı Qumru Həsənova və onun azyaşlı övladları - 12 yaşlı Zeynəb Həsənli, 9 yaşlı Gülay Həsənli və 7 yaşlı Yavər Həsənli yaşadıqları evdə dəm qazından zəhərləniblər.
Faktlarla bağlı araşdırma aparılır.
