Nalayiq videoya görə əmisi oğlunu öldürən şəxsə hökm oxunub. Bu haqda 2 sentyabr tarixində Oxu.az məlumat verib.
Yasamal rayonunda gözəllik salonunun qarşısında 2019-cu il martın 1-də Kamil Səttarlı əmisi oğlu Emin Babaverdiyevi qətlə yetirib.
İstintaqla məlum olub ki, Kamil Səttarlı qohumu Emin Babaverdiyevin “PlayStation” klubda, kabinetlərin birində naməlum qızla cinsi əlaqədə olmasını əks etdirən videogörüntünün olmasını bilib, ona bununla əlaqədar iradını bildirib. Emin onun iradına məhəl qoymayaraq Kamilin telefonuna özünün və ailəsinin ünvanına mütəmadi olaraq nalayiq məzmunlu mesajlar göndərib (ana-bacısını söyüb).
Kamil qohumunun onu niyə söydüyünü anlamayıb, Eminə onu vuracağını bildirib. Buna baxmayaraq, dəfələrlə ona eyni məzmunlu, təhqiramiz mesajlar göndərdiyindən Emini axtarmağa başlayıb. Kamil qisas məqsədilə əmisi oğlunu güdərək onu bərbərxanadan çıxarkən yaxalayıb və döş qəfəsinə bıçaqla üç zərbə endirərək öldürüb. Zərbələrdən ikisinin Eminə dəydiyini hiss edən Kamil onun gözlərinə baxa-baxa söyüş söyüb və dərhal oradan qaçıb. O, yaşadığı evə gələrək ata-anasına elədiyi hərəkət barədə danışıb.
Ailəsi ona təslim olmağını məsləhət görüb, lakin Kamil uzaq qohumlarının evində bir müddət gizlənmək istəyib. Yolda olarkən polis əməkdaşı ona zəng edib, harada olduğunu soruşub və Eminin öldüyünü bildirib. Artıq gizlənməyin mənasız olduğunu anlayan Səttarlı polisə təslim olub.
Bakı Ağır Cinayətlər Məhkəməsinin hökmü ilə Kamil Səttarlı 13 il 6 ay müddətinə azadlıqdan məhrum olunub. Məhkəmə prosesində Kamil Səttarlı ittiham üzrə özünü təqsirli bilib. Amma qeyd edib ki, törətdiyi cinayət əməlindən peşman deyil.
[caption id="attachment_67789" align="alignnone" width="800"]
Foto Baku Tv-nin rəsmi saytı[/caption]
