Bakıda zorlanması ilə bağlı polisə şikayət edən müğənni sonradan öz istəyi ilə cinsi əlaqədə olduğunu xatırlayıb. Bu haqda BakuPlus.az Oxu.az-a istinadən bu gün, 10 sentyabr tarixində xəbər verir.
Cari ilin mart ayının 7-də gecə saat 03:00-da Binəqədi rayonunda 27 yaşlı Camal Axundov tanışı Nərminə (adlar şərtidir – red.) xəsarətlər yetirib.
“Martın 6-da saat 20:00 radələrində Dərnəgül yolunda yerləşən kafedə müğənni kimi oxuduğum zaman Nərmin ilə tanış oldum. O da həmin kafedə müğənni kimi oxuyurdu. Birlikdə bir neçə mahnı oxuduq. Sonra saat 21:00-da oxumaq üçün Nizami rayonu ərazisində yerləşən klublardan birinə dəvət edildim. Bu barədə Nərminə bildirdim. Onun da kluba getməsini istədim. Nərmin də razılaşdı. Birlikdə həmin kluba getdik”, - deyə Camal ifadəsində bildirib.
Kluba 21:30-da çatan cütlük təzəcə tanış olduqları Elmir və Validə ilə gecə yarısı oranı tərk edərək qarşılıqlı razılıq əsasında hotelə yeyib-içməyə gediblər.
Camal deyib ki, içki məclisi bitəndən sonra istirahət etmək üçün Nərmin ilə birlikdə sifariş verdikləri digər otağa keçiblər. Olanlar da elə bundan sonra başlayıb.
Camalın ondan xoşu gəldiyini öyrənən Nərmin onunla öz razılığı ilə cinsi əlaqədə olub. Daha sonra Camal evə getmək istəyini bildirən Nərminə yuxusunun gəldiyini və avtomobilin digər otaqda yatan Elmirə məxsus olduğunu söyləyib.
Nərminin təkidlə evə getmək istəməsi mübahisəyə səbəb olub. Bu zaman Camal şillə ilə onun qol və baldır hissələrinə iki-üç dəfə vurduğunu deyib.
Növbəti günün səhəri o, Nərmini Masazır qəsəbəsi, “Qurtuluş 93”-də yerləşən evinə aparıb.
Təqsirləndirilənin sözlərinə görə, evinə getdikdən sonra Nərminin ondan şikayət etdiyini bilib.
Zərərçəkmiş Nərminin sözlərinə görə, evinə gəldikdən sonra bədəninə baxdıqda üzərində xəsarətlər olduğunu görüb. Camalın onu zorladığını düşünərək Binəqədi rayon Polis İdarəsinin 6-cı polis bölməsinə ərizə ilə müraciət edib.
Nərmin sonradan ərizəni hirsli vəziyyətdə yazdığını və Camalla öz razılığı ilə cinsi əlaqədə olduğunu qeyd edib.
Məhkəmə təqsirləndirilən şəxsin zərərçəkmişlə barışmasını, zərərçəkmişə dəymiş ziyanın ödənilməsini nəzərə alıb. Camal barəsində olan cinayət təqibinə xitam verilib. O, cinayət məsuliyyətindən azad edilib.
