Sabunçu Rayon Məhkəməsində keçmiş arvadını döyməkdə təqsirləndirilən Sərdar Səmədovun (şərti) cinayət işi üzrə məhkəmə iclası başa çatıb. Bu haqda 9 sentyabr tarixində Oxu.az məlumat verib.
Qərara əsasən, o, Cinayət Məcəlləsinin “Qəsdən sağlamlığa yüngül zərər vurma” maddəsi ilə təqsirli bilinərək 300 saat ictimai işlər cəzasına məhkum edilib.
Belə ki, bu il avqustun 4-də Sabunçu rayonu, Bakıxanov qəsəbəsində Sərdar Səmədov keçmiş həyat yoldaşı İlhamə Qarayeva (şərti) ilə yaşadığı mənzildə olarkən ondan 30 manat pul istəyib. Qadın isə həmin pulu ona vermədiyinə görə Sərdar arvadının sağ ayağının baldır nahiyəsinə vuraraq ona bədən xəsarəti yetirib.
Məhkəmə iclasında Sərdar Səmədov elan edilmiş ittihamda özünü qismən təqsirli bilib. Sərdar deyib ki, onlar İlhamə ilə rəsmi boşansalar da, eyni evdə yaşamağa davam ediblər.
Məhkəmə iclasında zərərçəkmiş şəxs ondan şikayətçi olduğunu bildirib:
“Sərdar evə baxmadığı və spirtli içki aludəçisi olduğuna görə dörd ildir rəsmi olaraq ayrılmışıq. Nikahdan iki uşağımız var və onlar məndə qaldığı üçün Sərdar tez-tez yaşadığımız evə gələrək burada qalırdı və məndən pul tələb edirdi. Son zamanlar o, mərc oyunlarına qurşandığı üçün müxtəlif məbləğlərdə pullar uduzurdu. Hadisə günü məndən 30 manat pul istədi. Sərdara pul vermədiyim üçün məni vuraraq xəsarət yetirdi”.
