Bakının Binəqədi rayonu, Sulutəpə qəsəbəsi ərazisində yol qovşağına yaxın ərazidə salınmış yaşıllıq zolaqlarında ağaclar məhv olur. Bu haqda bu gün, 26 iyul tarixində Oxu.az məlumat verib.
Bir neçə il əvvəl burada yamyaşıl şam ağacları böyüyürdüsə, indi ağacların yarıdan çoxu quruyub və ya aşıb.
Yerli sakinlər bildirirlər ki, ərazi Binəqədi Rayon İcra Hakimiyyətinə (RİH) tabedir. Lakin qurum buranın Abşeron rayonuna aid olduğunu qeyd edib, Abşeron RİH-dən isə, əksinə, bu əraziyə cavadeh olmadıqlarını söyləyiblər.
“Həmin əraziyə Xırdalan bələdiyyəsi tərəfindən müəyyən nəzarət olunur. Eyni zamanda orada hal-hazırda bir neçə ağac təbii olaraq quruyub. Amma ağacların nə kəsilməsi, nə də qurudulmasından söhbət gedə bilməz”, - Abşeron RİH-nin sözçüsü deyib.
Bakı Şəhər İcra Hakimiyyətinin Yaşıllaşdırma Təsərrüfatı Birliyindən də eyni cavab gəlib. Onlar da bu məsələyə münasibət bildirməkdən yayınıblar. Üstəlik sözügedən ünvanda “Körpü-Bina-Tikinti” MMC tərəfindən tikinti işləri aparılır. Qurumdan bildirildi ki, ərazinin müəyyən hissəsi həqiqətən şirkətə aiddir, lakin ağacların qurumasına görə onlar məsuliyyət daşımırlar.
